تعليم الايمان الارثوذكسى للاطفال

كتاب لية احنا مسيحيين

اعداد نصرى مترى

سؤال وجواب مع الملايكة الصغار

س1 : يعنى اية مسيحيين ؟

لما نقرا فى الانجيل نعرف ان يسوع المسيح كان بيعلم الناس عن ملكوت السموات والناس اللى حبت تعليمة وسمعت كلامة وامنوا بية كانوا يقعدوا حوالية وهو بيعلمهم الايمان السليم وكانوا بيقولوا لية يا معلم يعنى يا مدرس وعلشان كدة الناس اعتبروهم انهم بقوا تلاميذ لة وبعد ما يسوع المسيح صعد الى السما كل الناس الى امنت بية بقى اسمهم تلاميذ لغاية ما الناس الى فى انطاكية سموا كل اللى يأمنوا بالسيد المسيح يبقى اسمهم مسيحيين

س2 : طيب ازاى بقينا مسيحيين ؟

كلنا كلنا اتولدنا نونو صغير من ماما وبابا المسيحيين وبعدين واحنا صغيرين بابا وماما اخدونا للكنيسة وابونا القسيس ومعاة شماس صلوا على مية المعمودية وبعدين ابونا غطسنا فى الميةاللى صلوا عليها تلات مرات بأسم الاب والابن والروح القدس وبعدين حل علينا الروح القدس لما ابونا رشمنا بالزيت الميرون المقدس ومن اليوم دة احنا بقينا تلاميذ يسوع المسيح وهياكة المقدسة وروح ربنا فينا

س3 : طيب ازاى النونو الصغير يبقى تلميذ الرب يسوع وهو مابيعرفش يتكلم ؟

الانجيل بيقولنا انة حتى النونو الصغير بيسبح ربنا بس احنا مش فاهمين النونو لما بيفرح ويطلع اصوات الفرح الحلوة الى بنسميها نغنغة فى الحقيقة انة ممكن يكون بيسبح ربنا مع الملايكة ولما بيكبر ويتعلم الكتابة والقراءة بيعرف يقرأ الانجيل ويبقى تلميذ يسوع

س4 : طيب هو لية ربنا خلق الدنيا وخلقنا ؟

من شدة محبة ربنا لينا خلق كل حاجة فى السما وعلى الارض فى ست ايام وبعدين خلقنا فى اخر يوم وبعدين استريح فى اليوم السابع

س5 : طيب يا ترى ربنا خلق اية فى اول يوم ؟

ربنا خلق النور

س6 : طيب والتانى؟

ربنا خلق السما والمية وفى اليوم التالت خلق الارض وكل الزرع والاشجار وفى اليوم الرابع خلق الشمس والقمر وكل النجوم وفى الخامس خلق كل الطيور والسمك وفى السادس خلق كل الحيوانات وبعدين ابونا ادم وامنا حواء

س7 : طيب ازاى ربنا خلق ابونا ادم وامنا حواء ؟

ربنا اخد حتة طين من الارض ونفخ فيها وخلق ابونا ادم وبعدين قال اخلق لة زوجة علشان تونسة زى بقيت المخلوقات ومايبقاش لوحدة ويخلفوا صبيان وبنات ويعيشوا تحت رعايتى فرحانين بنعمتى عليهم وفى يوم خلا ابونا ادم نايم واخد منة ضلع من صدرة من غير ما يحس وخلق لية امنا حواء وابونا ادم صحة من النوم لقاها ففرح جدا