نصائح ايام الخطوبه للبنات فقط

نصائح ايام الخطوبة


آنستي العزيزة.. لو ربنا فك عقدتك.. واتخطبتي.. فإليك نصائح حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثوااااه الأخير في قفص النسانيس.. قصدي قفص الزوجية السعيد..

أجمل ما في الخطوبة العزومات الرومانسية.. على أحلى محلات أكل في البلد.. واللي عمرك مانتي شايفاها بعد الجواز.. المهم نصائحي لك عند أي عزومة مع خطيبك.. كلها رقَّه ..


1- الأول لازم تعرفي إن الشوكة والسكينة بيتمسكوا من إيديهم من الطرف يعني مش من الوسط ولا من البوز زي الخنجر ولا من فوق طبعًا


2- العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري.. أوعي.. العيش بيتقطع بالسكينة في الطبق .. وبعدين تاخدي لقمة.. لقمة.. بالعافية.. قال يعني نفسك مسدودة.. اضغطي على أعصابك جدااا وبعدين لما تروَّحي.. إبقي بعتري في الاكل زي مانتِ عايزه



3- الشوووربة.. أبوس كعب رجلك.. بند الشوربة ده مهم جدًاااا.. الشوربة تتشرب من غير صوت خالص.. ومن غير ماتقعدي تنفخي فيها.. زي القهوجي اللي بينفخ ف الحجر للزبون .. وطبعًاااااا عايزك تنسى تمامًا.. السلطانية اللي بتقيميها على بقك ف البيت.. وتدلدقي على روحك..
بالمعلقه وبدون صوت.. سخنة ولعة برضه بدون صوت.. وتسيبي تلت الطبق على الأقل.. مش تميليه.. عشان تشربيها لآخر نقطة.....



4- الرز طبعاً .. بيتاكل بالشوكة.. أوعي إيدك تتمد على المعلقة.. وتغرفي من طبق الرز وتكلي.. إوعي.. الرز بالشوكة.. وكأنك بتبوسيه مش بتاكليه..



5- المكرونة.. الاسباكتي.. برضه بالشوكة.. تتلف على طرف الشوكة.. لحد ما تخلص وبعدين تحطيها في بؤك من سكات.. مش تشفطي المكرونة عود عود..



6- السمك.. مشكلة.. شوفي.. بتفصلي اللحم عن الشوك.. إزاي..؟؟ تقطعي اللحم من النص.. بالطول وبعدين تفردي اللحم على الجانبين ولما تخلصي ناحية.. متقلبيش السمكة.. بلاش ذكاء.. شيلي السلسلة
بالشوكة والسكينة وحطيها ف جنب الطبق وكملي أكل النص التاني.. وبدل الفيلم الهندي ده.. نصيحة.. ماتكليش السمك خالص.. قولي مابحبش السمك وخلصي نفسك..


7- الجمبري.. -إذا كنتي عارفاه-.. أول ماطبق الجمبري ينزل.. بصيله بقرف واحتقار شديدين.. آل يعني زهقانة من كتر أكل الجمبري الجامبو ف بيت ببااااا.. وأتنهدي جامد وقولي.. برضه..؟؟؟ وتروحي قاطعة راس الجمبريياية.. بالشوكة.. أنا ف عرضك إنسي المصمصة دلوقت..



8- البطاطس سواء مسلوقة أو محمرة.. أوعي تهرسيها وتحطيها على الرز وتكلي ...لا..لآ...لآ...بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي..



9- الفاكهة.. لو الفاكهة فيها بذر.. طلعيه من بؤك بالراحة وحطيه ف إيدك وهي مقفولة.. وبعدين ف طفاية السجاير اللي ع الترابيزه.. أوعي ياحبيبتي من نظام التفتفة للبذر.. إنسي....



10- ولما تخلصي أكل تحطي إيدك على بطنك.. -اللي عصافيرها بتصوصو من العينات اللي كلتيها-.. وتقولي له مش ممكن.. أنا عمري ما اتفجعت كدة..
أنا أودامي أسبوع.. هابطل أكل فيه.....


وبعدين تمسكي الفوطة اللي دايمًا موجودة ع التربيزة من غير لازمة.. وتبوسيها.. آل يعني بتمسحي بؤك..


وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك.. لفة الفول
والطعمية اللي جايباها معاكي.. وبالهنا والشفااااااااااا






اتمنى تكونوا يا بنات استفدتم
و يريت الللي يجرب النصيحة يبقى يقولنا النتيجة

هههههههههههههههه

بصراحه انا لو مكانها هلبس الطبق فى وشه واقله خليك جنب امك احسن

هههههههههههههه
شكرا استاذ صبرى على مرورك

خلى عندك امل يا هانى
شكرا على مرورك

ههههههههههههههههههه موضوعك لذيذ جدا يا سهير بس ان عن نفسى لو فيها من كده يبقى ان شاءالله ماخرجت معاه بلاش جواز احسن ولا الغلب ده دالنبى عربى

هههههههههههه
ده كلام يا منى لكن ساعه الجد هتتمنى تخرجى معه
ههههههه
شكرا على مرورك

مش لازم اكل في فتره الخطوبه اساسا نقضيها رجيم

الرجيم مش وحش دا مفيد خالص

ربنا يستر بس وميطلعش بخيل وجلدة

الموضوع ده صعب خالص من اللأفضل انهم لا يتزوجوا علشان اللى ما كلتهوش وز وز فى الخطوبه حتكله بعد الزواج بطبط
والله يرحمه اللى حيتزوجها .
ده شكله قبل الزواج


وده شكله بعد الزواج

هاااااااااااااااى عليكم جميعا وحشتونى خالص
شكرا على مروركم على الموضوع
بس انتم تعرفوا ان المواقف اللى زى كده هى الفكاهه بتاعه الخطوبه
ربنا يبارككم